By Hafnarfréttir 
Ölfusingur ársins 2025 er Anna Berglind Júlísdóttir danskennari með meiru. Hún hefur kennt dans í áratugi og meðal ummæla sem voru send með tilnefningum eru:
,,Held að það sé kominn tími á að heiðra konuna sem hefur kennt sveitarfélaginu að dansa síðastliðin 30+ ár! Stuðlað að skemmtilegri og jákvæðri hreyfingu fyrir unga sem eldri. Hjálpað krökkum að finna takt og fylgt þeim eftir t.d í prufur hjá leikhúsum fyrir söngleiki og á sýningar hjá stórum dansskólum í Reykjavík. Veit að það eru margir Ölfusingar sem eru henni afskaplega þakklátir, þar á meðal ég!
,,Fyrir að halda úti metnaðarfullu og flottu dansstarfi hjá börnum í Þorlákshöfn. Hún hefur vakið upp áhuga hjá ólíklegustu börnum og mörg hafa farið í frekara dansnám, stigið á leikhússvið og farið út fyrir þægindarammann fyrir hennar tilstilli. Hún er alltaf svo jákvæð, skemmtileg og góð og börnin elska hana.„
,,Fyrir að stuðla að betri heilsu og þar af leiðandi geðheilsu þorpsbúa í tugi ára:”
,,Hún er algerlega frábær gleðigjafi og fyrirmynd fyrir börnin í Grunnskólanum okkar.”
,,Ötul í sínu starfi til margra ára í vinnu með börnum sem fullorðnum.”
,,Fyrir kennslu í dansi, kennslu í klæðnaði. Svo er hún bara svo mikið æði.”
,,Hún hefur í mörg ár kennt dans í sveitarfélaginu og aðstoðað nemendur sína við næstu skref, td. áheyrnaprufur í Rvk o.fl. Einnig kennir hún börnum grunnskólans dans og stendur fyrir árlegri danssýningu þar sem börnin fá að láta sitt ljós skína.”
Blaðamaður Hafnarfrétta heimsótti Önnu Berglindi á hennar fallega heimili og færði henni viðurkenningu og tók hana tali.
Hvernig varð þér við þegar þú fékkst fréttir af því að þú hefðir verið kjörin Ölfusingur ársins 2025?
,,Bara mikill heiður. Ég átti erfitt með að trúa því. Þetta kom skemmtilega á óvart og það er gott að finna að það sem maður hefur verið að gera sé að skila sér og að fólk hafi haft gaman af því þegar það hefur komið til mín í dans, átt góðan tíma og þetta sé eitthvað sem nýtist.“
Hvaða áhrif hefur svona viðurkenning fyrir þig?
,,Þetta er hvatning til að halda áfram og gera enn betur. Það er alltaf hægt að bæta sig í öllu.“
Hvernig kviknaði áhuginn á dansi?
,,Fyrstu minningarnar eru þegar danskennararnir, konurnar sem voru að kenna hjá Heiðari Ástvalds komu hérna í skólann. Það var bara besti dagur ársins. Þegar ilmvatnslyktin fannst um allan skóla vissi maður að þær voru að mæta á svæðið og maður gat skráð sig í dans. Mér fannst þetta vera lífið, sko. Alveg ofboðslega skemmtilegt.“
Hvað varð til þess að þú fórst sjálf að kenna dans?
,,Ég var alltaf í dansi hjá Heiðari Ástvalds í gamla daga. Svo komu þau frá Nýja dansskólanum, Rakel og Níels og voru með danskennslu. Þau buðu mér svo að koma sem nemi til þeirra, sem ég þáði og sé ekki eftir því. Það eru þvílík forréttindi að fá að vinna við það sem manni þykir skemmtilegast.“
Finnst þér vera munur á kennslunni eftir því hvaða aldur þú ert að vinna með?
,,Nei, í sjálfu sér ekki. Það er mitt markmið að sem flestir læri að dansa. Ég elska þetta allt. Mér finnst yndislegt að vinna með börnum. Svo hef ég verið með hóp í 30 ár sem er í dag mitt vinafólk. Þetta hefur þróast út í miklu meira en bara danstíma. Þetta er ómetanlegur vinskapur. Við ferðumst saman til útlanda til að dansa og skemmta okkur. Ég hef kennt víða um landið og á tímabili fór ég einu sinni í viku í Vík í Mýrdal til að kenna Zumba. Ég hef kennt á Hvolsvelli og gott ef ekki Hellu líka þannig að ferðirnar voru vel nýttar.“
Hvað hefurðu verið að kenna dans í grunnskólanum í mörg ár?
,,Ég hef verið að kenna í Grunnskólanum í Þorlákshöfn í tæplega 26 ár núna. Það er ótrúlegt hvað tíminn líður hratt. Mér finnst einmitt krakkarnir sem eru núna hjá mér í 7. bekk vera rétt nýbyrjuð í skóla. Bara korter síðan þau voru í fyrsta bekk. Ég kenni dans í 1.-7. bekk og er svo með dansval á unglingastiginu. Ég er einmitt með mjög stóran og flottan hóp núna í valinu sem kom hingað heim til mín í jólaparti með gjafir handa hver annarri og það var mikil stemning.“
Hafa einhverjir ákveðið að leggja dansinn fyrir sig eftir að hafa lært hjá þér í grunnskóla?
,,Já, þau eru nokkur sem hafa gert það. Ég hef til dæmis hjálpað til við að setja upp fyrir dansprufur sem svo skiluðu sér í hlutverki í einu af stóru leikhúsunum. Einnig hafa nemendur héðan keppt í dansi með góðum árangri.“
Hvernig dansa kennirðu?
,,Ég byggi kennsluna mikið upp á samkvæmisdönsum og gömlu dönsunum sem er frábær grunnur. Það er samt ekki endilega málið að læra eitthvað mikið heldur að hafa góðan grunn og geta bara farið út á gólf til að hafa gaman. Þú þarft ekkert að vera neinn meistari í dansi. Það er góð forvörn. Sumir hafa einmitt komið til mín og sagt: ,,Ég vildi að ég hefði tekið betur eftir í danstímum svo ég gæti bjargað mér á dansgólfinu.” Þetta er auðvitað meira en bara einhver spor. Ef við pælum til dæmis í íþróttum, þá er það oft svo mikil fótatækni og samhæfing. Í samkvæmisdönsum þarf að vera góð samvinna milli krakkanna, þau þurfa að hjálpast að og þar skiptir samhæfingin máli. Þetta er bara hollt og gott.“
Er eitthvað sem stendur upp úr á ferlinum?
,,Það sem mér finnst alltaf standa upp úr er að þó oft komi erfið augnablik í kennslunni þá kannski kemur einhver til mín og segir: ,,Anna, þetta er það skemmtilegasta sem ég geri. Það er svo gaman í dansi og ég vildi að ég gæti verið oftar hjá þér.” Þá hugsar maður: ,,Já, alveg rétt. Nú man ég tilganginn.” Þetta er það besta. Að heyra þegar fólk er ánægt. Þá veit ég að ég er að gera eitthvað rétt. Svo er dásamlegt eftir danssýningarnar, að sjá öll þessi börn, mörg með einhverjar áskoranir, fara út á gólf og sýna fyrir framan fullt íþróttahús af fólki. Það er bara æðislegt og heilmikið afrek fyrir þau. Það gerir mig extra glaða.“
Hvaða áhrif telurðu að danskennslan hafi haft á samfélagið hér?
,,Ég hef auðvitað verið með mjög marga úr Þorlákshöfn í dansi. Mér finnst mjög gaman að fara á ball og sjá þessi pör sem hafa verið hjá mér brillera á gólfinu. Fólk sem hefur verið að koma á kvöldnámskeið hjá mér. Þau hafa mörg talað um að í danstímum gleymi þau öllum vandamálum, hugsi ekki um vinnuna, eða daglegt amstur. Þau bara gleymi sér í þessu þennan klukkutíma og tíminn hafi verið búinn áður en þau vissu af. Það er gott að geta veitt öðrum þessa tilfinningu.“
Hvað er framundan hjá þér?
,,Bara að halda áfram í skólanum og þar verður auðvitað danssýning í vor eins og mörg undanfarin ár. Það er alltaf mjög stór stund. Svo stefni ég á að fara út til Bandaríkjanna, til Nashville og bæta aðeins við mig þar. Ég kenni heilmikið línudans og krökkunum finnst mjög gaman að dansa hann. Það hafa einmitt verið svo mörg lög vinsæl undanfarið sem eru línudansalög. Þetta er ekkert eins og það var, bara pjúra Country, heldur bara æðisleg lög til að nota í kennslunni. Ég reyni alltaf að vera með eitthvað nýtt fyrir nemendur. Á Tik-tok eru oft svona bútar þar sem allir dansa eins og þá pikka ég kannski upp kafla úr þeim og bý svo til dans í kringum það. Ég hitti alltaf einu sinni í mánuði danskennara sem eru að kenna í Reykjavík og eru öll í grunnskólakennslu og við berum saman bækur okkar og höfum gaman saman. Danskennarastéttin er ekki mjög fjölmenn og mættu alveg vera fleiri í þessu. Framundan er bara dans og meiri dans.“
Fer mikill tími í undirbúning fyrir kennsluna?
,,Í samkvæmisdönsum og gömlu dönsunum er það í raun ekki mikill tími sem fer í undirbúning en ég reyni alltaf að vera með nýjan jóladans á hverju ári og Halloweendans. Þeim finnst það alveg geggjað. Svo bý ég til línudansa og hip-hop dansa. Á danssýningunni sér fólk í rauninni bara pínulítið brot af því sem við erum að gera. Hver bekkur er að læra 9 dansa fyrir utan þessa dansa sem ég bý til. Stundum tökum við Zumba líka. Við byrjum alltaf á barnadönsum og hliðar saman hliðar og skiptispori, svona grunni. Svo bætast hinir dansarnir við. Dans er ekki bara góð hreyfing heldur hjálpar hún til við svo margt annað líka. Eitt sinn var mér sagt að það að dansa gæti hjálpað til við að læra að lesa. Það er þessi samhæfing hugar og líkama. Að byrja á grunninum og bæta svo við. Mér fannst þetta mjög athyglisvert.“
Viltu segja eitthvað að lokum?
,,Það geta allir lært að dansa. Það er ekki spurning. Það er bara að hafa sig af stað. Það er oft þannig með karlmenn til dæmis að þegar þeir eru komnir af stað, búnir að láta sig hafa það að fara á dansnámskeið, þá eru þeir oftar en ekki til í að halda áfram. Þetta er nefnilega oft spurningin um að komast yfir einhvern vissan hjalla. Ég held að það sé rosalega gott fyrir pör að fara saman í danstíma. Það er mitt hjartans mál að sem flestir læri að dansa. Það gerir ekkert nema bæta færni í einu og öllu. Svo langar mig fyrst og fremst að þakka öllum fyrir að kjósa mig. Þetta er mikill heiður og segir mér það að þessi hugsjón mín er að skila einhverju góðu. Ég trúi því. Hjartans þakkir fyrir mig. Að lokum vil ég þakka öllum þeim sem hafa verið með mér í kennslunni í gegnum tíðina. Það er ómetanlegt að hafa gott fólk með sér og það hef ég svo sannarlega haft.“
Hafnarfréttir óska Ölfusingi ársins 2025, Önnu Berglindi Júlísdóttur innilega til hamingju með nafnbótina og hún er svo sannarlega vel að henni komin.
Aðrir sem hlutu tilnefningu að þessu sinni voru:
Almar Kárason, Ása Berglind Hjálmarsdóttir, Ásberg Lárentsínusson, Ásgerður Eiríksdóttir, Björgunarsveitin Mannbjörg, Elísa Nielssen, Elliði Vignisson, Erla María Ingólfsdóttir, Geir Sveinsson, Grétar Ingi Erlendsson, Guðlaugur Orri Gíslason, Guðmundur og Elín í Búðinni, Halldór Kristinn Viðarsson, Halldóra Björk Guðmundsdóttir, Helena Helgadóttir, Ingimar Rafn Ágústsson, Jón Reynir Sveinsson, Kári Böðvarsson, Lúðrasveit Þorlákshafnar, Magnþóra Kristjánsdóttir, Markús Örn Haraldsson, Matthías Geir Gunnarsson, Michal Leszek Kutjoth, Ólafía Helga Þórðardóttir, Róbert og Guðlaug, Sigríður Stefánsdóttir, Sigrún, Edda og Lovísa dósadrottningar, Theodór Elvar Arnar Owen Örvarsson, Tómas Jónsson, Torfi Hjörvar Björnsson, Þollóween, Þorkell Þráinsson.
Kjósendum er þökkuð þátttakan. Megi nýtt ár færa ykkur öllum gæfu og gengi.