By Hafnarfréttir 
Flokkur fólksins hefur lagt hjarta sitt í þessa kosningabaráttu, þar er allt undir. Ég hef lagt mig alla fram undanfarnar vikur, sem og mínir dásamlegu vinir og félagar á listanum. Ásthildur Lóa Þórsdóttir sem með þrautseigju sinni og elju hefur unnið stórsigur, Sigurður Helgi Pálmason í öðru er fullkomnlega verðugur fulltrúi Reykjanesbæjar, bæjar sem rær lífróður og þarf nauðsynlega að fá sína rödd inn á Alþingi.
Ég er í þriðja sæti hjá Flokki fólksins, baráttusæti, en ef ég verð svo heppin að ná inn á þing þá mun ég fara þangað með hagsmuni heimabyggðar minnar Þorlákshafnar og Ölfuss í forgrunni.
Mín einlæga von er sú, að önnur kosning, sem skiptir mig ekki minna máli verði felld á kjördag. Heidelberg Materials er alþjóðarisi sem hefur sýnt sig í að vera hörmulegur granni annara samfélaga í formi stórra og mengandi grjótmulningsverksmiðja, vill nú planta einni slíkri niður, alveg við fallega heimabæinn minn, í göngufæri við búðina, og ennþá nær nýja leikskólanum okkar.
Þorlákshafnarbúar hafa barist svo hart gegn þeim áformum að aðdáunarvert verður að teljast. Ég er afar stolt að tilheyra svo frábæru og réttsýnu samfélagi. Húrra fyrir öllum þeim sem hafa látið vel í sér heyra og allar góðar vættir gefi að við berum gæfu til að fella þetta á laugardaginn, landsins og afkomenda okkar vegna.
XF státar af einvala og samtaka fólki sem öll vinna að því sama, ábyrgum stefnumálum Flokks FÓLKSINS og ávallt út frá hagsmunum þegna þessa lands og heimilanna. Berjast fyrir hópa sem minna mega sín fátæka, fátæka eldri borgara og öryrkja. Fyrir gjörbyltu heilbrigðiskerfi um land allt, efla heilsugæslur, úrræði fyrir geðsjúka, sem alltaf virðast lenda á veggjum í kerfinu, réttlæti fyrir Brca-bera sem reka sig á kostnaðarsamar hindranir ofan í graf alvarlega stökkbreytingar í genum sem margfalda líkur á krabbameini.
Fyrir helsjúka sem horfa framan í það að vera deyjandi, þurfa að reiða upp budduna aftur og aftur, ofan í það reiðarslag sem fylgir fyrirliggjandi ótímabærum dauða. Minnka álag á starfsfólk og setja mannúðarsjónarmið í forgang. Kerfið á að vera hlýlegt og opið, ekki kalt og lokað þegar kemur að því að veikt fólk þarf að nýta sér það.
Eflum á ný hnignandi landsbyggðina, stóraukum strandveiðar sem hleypa á ný lífi í sjávarþorp og hlúum að bændastéttinni. Raforkuverð til garðyrkjubænda stefnir nú í að verða hækkað um 20% um næstu áramót og sennilega annað eins ári seinna. Þessu verðum við að bregðast við. Bætum samgöngur, borum jarðgöng, byggjum brýr og komum hringveginum í sómasamlegt horf.
Flokkur fólksins hefur þegar unnið fádæma þrekvirki, verandi í minnihluta, hugsið ykkur hverju væri hægt að koma í verk ef við kæmumst til áhrifa. Það yrði hreinsað til og sópað, það er þegar komin titringur í suma valdsmenn vegna þess. Ég er ekki að sjá Ingu Sæland eða aðra innan flokksins, gefa eftir að óþörfu í einu eða neinu, svo að það er full ástæða fyrir embættiskerfið og aðra flokka að virða okkar markmið.
Allt þetta og svo margt fleira viljum við fá umboð ykkar til að framkvæma , þetta er vel hægt, kakan er þegar til staðar, bæði stór og girnileg, það þarf einfaldlega að skipta henni jafnar framvegis.
Ég vil þakka öllum þeim sem að ég hef hitt á þessari stuttu vegferð fyrir einlægt og hlýlegt viðmót, hlakka til að hitta ykkur sem eftir eru, þetta tímabil hefur verið mér einstaklega dýrmætur skóli frá fyrsta degi.
☀️Áfram Flokkur fólksins, flokkurinn þinn.☀️
Elín Íris Fanndal Jónasdóttir, 3. sæti á lista Flokks fólksins í Suðurkjördæmi