By Hafnarfréttir 
Sveitarfélagið Ölfus er ekki tilbúið að ganga til samninga við Arctic Hydro ehf. um rannsóknar- og nýtingarleyfi sem snýr að virkjun vindafls á jörðinni Þorlákshöfn.
Arctic Hydro kynnti hugmyndir sínar fyrir bæjarstjórn í lok janúar sl. en hugmyndir fyrirtækisins voru að reisa vindorkugarð 3-4 km. vestan við Þorlákshöfn.
Vindorkugarðurinn átti að telja 20 stórar vindmyllur með vélarhús í um 80 m hæð yfir jörð og spaðarnir um 40 m langir, í efstu stöðu væru vindmyllurnar því í um 120 m hæð.
Í fundargerð bæjarstjórnar Ölfuss frá því 25. febrúar kemur fram að afstaða bæjarstjórnar skýrist af tvennu:
- Það svæði sem óskað er eftir til rannsókna og mögulegrar uppbyggingar á vindmyllum síðar meir hefur verið skipulagt fyrir annan iðnað og eru áform um uppbyggingu þar.
- Ferðaþjónusta er vaxandi atvinnugrein í Sveitarfélaginu Ölfusi og skapast sá vöxtur fyrst og fremst af ósnortinni náttúru svæðisins og ómetanlegu útsýni til sjávar og fjalla.