Digiqole ad

„Með þessari framkvæmd viljum við minna á stærð og styrk okkar magnaða sveitarfélags“

 „Með þessari framkvæmd viljum við minna á stærð og styrk okkar magnaða sveitarfélags“

Tölvuteiknuð grunnhugmynd að merkinu sem verið er að reisa.

Þriggja metra háir baklýstir stafir sem mynda orðið „ÖLFUS“ munu prýða veglegt merki sem verið er að byggja við sveitarfélagamörk Ölfuss og Kópavogs í vegkantinum nálægt Litlu kaffistofunni. Stefnt er að því að merkið verði tilbúið í febrúar eða mars ef veður leyfir.

Í fjarhagsáætlun Sveitarfélagsins Ölfus var upphaflega gert ráð fyrir 10 milljónum króna í verkið en allt stefnir í að endanlegur kostnaður gæti orðið um 12 milljónir króna að sögn Sigmars B. Árnasonar sviðsstjóra framkvæmda- og umhverfissviðs Ölfuss.

„Sá munur liggur aðallega í uppbyggingu undirstöðu og stærð/þykkt veggs og jarðvinnu, en vegna staðsetningar hans þá þurfti að hafa það allt stærra og meira. Einnig var aukakostnaður vegna rafmagns,“ segir Sigmar í samtali við Hafnarfréttir.

Elliði Vignisson bæjarstjóri Ölfuss segir hugmyndina bakvið merkið víðþekkt. „Flestir þekkja til að mynda myndalega merkingu Reykjanesbæjar og Grindavíkur á sínum sveitarfélagamörkum. Um þessa leið fara hundruðir þúsunda farþega á hverju ári og eðlilegt að við minnum á tilveru okkar gagnvart þeim. Með þessari framkvæmd viljum við minna á stærð og styrk okkar magnaða sveitarfélags og ramma náttúrugæði og einstakt mannlíf dálítið meira inn en gert hefur verið.“