By Hafnarfréttir 
Eftir að Þorlákshafnarbúinn Ásgeir Kristján Guðmundsson missti vinnuna í kórónuveirufaraldrinum ákvað hann að finna sér eitthvað jákvætt að gera og byrjaði að spila og birta eitt lag á dag á Facebook síðu sinni.
Ásgeir, sem einnig er trúbador, hefur daglega sett inn lag á Facebook síðastliðna sextíu og sex daga eða frá því að hann missti vinnuna en hann sagði frá verkefninu í viðtali við Magnús Hlyn á Stöð 2 um helgina.
„Ég tók upp hjá sjálfum mér að gera „Lag á dag“ og það hefur fengið mjög góð viðbrögð. Fólk er að senda mér til baka að það hjálpi sér í leiðindunum,“ sagði Ásgeir í fréttum Stöðvar 2.
Ásgeir segist ætla að halda áfram að birta lög daglega á Facebook eða alveg þangað til hann fær vinnu en hann passar upp á það að spila aldrei sama lagið tvisvar.
„Þetta hefur algjörlega bjargað geðheilsunni minni á þessum skrýtnu tímum, vakna á morgnanna og hugsa um þetta,“ segir Ásgeir.
Hér að neðan má sjá lag númer sextíu og fimm sem Ásgeir birti í gær. Frábært framtak hjá þessum flotta tónlistarmanni.