By Hafnarfréttir 
Rekstur Sveitarfélagsins Ölfus fyrir A og B hluta ársins 2019 var jákvæður um 300,3 milljónir króna samanborið við 242,8 milljónir árið 2018.
Rekstarniðurstaða A hluta var jákvæð um 195 milljón króna. Samkvæmt efnahagsreikningi nema heildareignir A og B hluta um 5.217 milljónum króna. Bókfært eigið fé sveitarfélagsins í árslok 2019 nam 2.964 milljónum króna og er eiginfjárhlutfall sveitarfélagsins 56,8 prósent.
„Skatttekjur án framlaga úr jöfnunarsjóði hækka úr 1.4 milljarði árið 2018 í 1,6 milljarð árið 2019. Þar með hafa skatttekjur hækkað um 16% frá árinu 2017. Skýringin á þessum auknu tekjum liggur í því að íbúafjölgun hefur verið mikil á þessum tíma.“ Segir í tilkynningu sveitarfélagsins.
Íbúum fjölgaði um 5,5 prósent á árinu 2019 og hefur þeim fjölgað um 13,3 prósent á fjórum árum. „Allt útlit er fyrir að íbúum fjölgi áfram á árinu 2020 enda mikil og hröð umsvif í byggingu íbúðarhúsnæðis í sveitarfélaginu.“
Fræðslu- og uppeldismál eru 50,4 prósent af skatttekjum, æskulýðs- og íþróttmál með 14,2 prósent af skatttekjum og félagsþjónusta 14,9 prósent. Samtals taka þessir þrír málaflokkar til sín 79,5 prósent af rekstrargjöldum sveitarfélagsins.
Skuldaviðmið Sveitarfélagsins Ölfuss þann 31. desember 2019 var 57,00 prósent en var 69,71 prósent í árslok 2018. Skuldir á hvern íbúa af samstæðu A og B hluta lækka um 62 þúsund á árinu eða úr 848 þúsund niður í 786 þúsund.
Rekstrartekjur hafnarinnar árið 2019 voru 229 milljónir króna og hækka um 12 prósent. Rekstrarniðurstaða hafnarinnar voru rétt tæpar 87 milljónir króna. „Mat flestra er að uppbygging hafnarinnar sem inn- og útflutningshafnar sé rétt að hefjast og árangurinn, svo magnaður sem hann er, sé einungis reykurinn af réttinum,“ segir í tilkynningunni.
„Sveitarfélagið Ölfus vinnur nú að því að nýta þá sterku stöðu sem birtist í ársreikningunum til að bæta þjónustu við bæjarbúa enn frekar og eftir atvikum að bjóða nýja íbúa velkomna,“ segir að lokum í fréttatilkynningunni.