By Hafnarfréttir 
Þessa dagana eru þrír vaskir tónlistarmenn á ferð um landið en þau ætla sér að spila á öllum 65 hjúkrunar- og dvalarheimilum landsins á 30 dögum.
Yfirskrift tónleikanna er „Nú verður glaumur og gaman, nú gleðjist hver einasta sál“ og eru það Tómas Jónsson, Ása Berglind Hjálmarsdóttir og Jökull Brynjarsson sem standa að verkefninu. Frítt er á alla tónleikana og öll gefa þau vinnu sína við þetta verkefni.
Þrátt fyrir að ekkert hjúkrunarheimili er að finna í Þorlákshöfn, þá ætla þau að renna við í höfnina í leiðinni og vera með tónleika á 9-unni á föstudaginn. „Það var bara ekki hægt að keyra framhjá Þorlákshöfn,“ segir Ása Berglind um tónleikana sem hefjast klukkan 20:30 og verður frítt inn.
„Þrátt fyrir að tónleikaröðin sé sérstaklega tileinkuð eldri borgurum þá eru allir velkomnir og sérstaklega hvetjum við aðstandendur eldri borgara í Þorlákshöfn að koma og eiga þessa stund saman,“ bætir Ása við að lokum um þetta glæsilega verkefni sem þau standa fyrir.
Hægt er að fylgjast með ferðalaginu á facebook síðu þeirra www.facebook.com/nuverdurglaumur
