Ársreikningar Sveitarfélagsins Ölfuss fyrir árið 2025 voru teknir til síðari umræðu og lagðir fyrir fund bæjarstjórnar þann 30. apríl síðastliðinn.
Elliði Vignisson bæjarstjóri fór yfir helstu stærðir í ársreikningnum og þær breytingar sem urðu á milli umræðna.
Rekstrarniðurstaða sveitarfélagsins samkvæmt A- og B-hluta var jákvæð um 1.463 milljónir króna, en rekstrarniðurstaða A-hluta var jákvæð um 1.053 milljónir króna. Heildareignir sveitarfélagsins samkvæmt efnahagsreikningi námu 11.475 milljónum króna og bókfært eigið fé í árslok 2025 var 7.485 milljónir króna. Eiginfjárhlutfall sveitarfélagsins var 64,48%.
Helstu niðurstöður rekstrareininga
Afkoma einstakra rekstrareininga var eftirfarandi:
- A-hluti sveitarfélagsins: Rekstrarafkoma ársins var 1.053,5 milljónir króna. Heildareignir námu 7.829,8 milljónum króna og eigið fé var 5.048,7 milljónir króna.
- Félagslegar íbúðir: Rekstrarafkoma var neikvæð um 12,8 milljónir króna. Eignir námu 95,1 milljón króna og eigið fé var neikvætt um 167,5 milljónir króna.
- Fráveita Ölfuss: Rekstrarafkoma var jákvæð um 72,6 milljónir króna. Eignir námu 538 milljónum króna og eigið fé 328 milljónum króna.
- Hafnarsjóður Þorlákshafnar: Rekstrarafkoma var 306 milljónir króna. Eignir námu 2.565 milljónum króna og eigið fé 1.989 milljónum króna.
- Íbúðir eldri borgara: Rekstrarafkoma var 1,3 milljónir króna. Eignir námu 457,5 milljónum króna og eigið fé 49,6 milljónir króna.
- Vatnsveita Þorlákshafnar: Rekstrarafkoma var 42,4 milljónir króna. Eignir námu 380 milljónum króna og eigið fé 237 milljónum króna.
- Uppgræðslusjóður Ölfuss: Sjóðurinn var lagður niður á árinu.
Samstæða sveitarfélagsins
Samstæða Ölfuss sýndi jákvæða rekstrarniðurstöðu upp á 1.463,3 milljónir króna. Heildareignir námu 11.474,7 milljónum króna og eigið fé 7.484,5 milljónum króna.
Ársreikningurinn var lagður fyrir fundinn og samþykktur samhljóða.
