Við, Sveinn Steinarsson og Hrönn Guðmundsdóttir, viljum lýsa yfir stuðningi okkar við framboð S-lista Samfylkingarinnar og félaga í Ölfusi í komandi sveitarstjórnarkosningum.
Í sveitarstjórnarmálum í Ölfusi hefur um langt skeið verið hefð fyrir framboðum sem byggja á breiðri þátttöku og hafa verið opin fyrir fólki með ólíkan bakgrunn, óháð hefðbundnum flokkatengslum. Á síðustu kjörtímabilum hafa þar meðal annars verið framboð á borð við Ö-listann og Framfarasinna. Að okkar mati hefur þessi nálgun verið sveitarfélaginu til styrks og stuðlað að málefnalegu samstarfi og fjölbreyttum sjónarmiðum í stjórnun þess.
Við teljum mikilvægt að áfram sé svigrúm fyrir fólk til að taka þátt í sveitarstjórnarmálum án þess að þurfa að skilgreina sig út frá hefðbundinni flokkspólitík. Reynslan sýnir að margt hæft og öflugt fólk hefur vilja til að leggja sitt af mörkum fyrir samfélagið, en myndi síður taka þátt ef aðeins væri um hefðbundin flokksbundin framboð að ræða. Breið þátttaka íbúa er mikilvæg forsenda öflugs sveitarfélags og góðrar ákvarðanatöku.
Þótt S-listinn sé í samstarfi við Samfylkinguna teljum við mikilvægt að undirstrika að þar kemur einnig saman fjölbreyttur hópur fólks sem á það sameiginlegt að vilja vinna að farsælli þróun Ölfuss. Á listanum eru einstaklingar með reynslu úr samfélagsmálum, atvinnulífi og stjórnsýslu ásamt fólki sem hefur ekki áður tekið þátt í hefðbundnu flokkapólitísku starfi.
Við teljum það vera styrkleika að fólk með mismunandi reynslu og sjónarmið geti sameinast um hagsmuni sveitarfélagsins og unnið saman á málefnalegum grunni. Sveitarstjórnarmál snúast fyrst og fremst um þjónustu við íbúa, ábyrga uppbyggingu og framtíð samfélagsins alls.
Við höfum kynnt okkur áherslur framboðsins og teljum þær raunhæfar og vel til þess fallnar að styðja við áframhaldandi uppbyggingu og velferð í Ölfusi, bæði í þéttbýli og dreifbýli.
Það er því okkar mat að S-listi Samfylkingarinnar og félaga sé traustur kostur fyrir þá sem vilja sjá yfirvegaða, samstarfsmiðaða og málefnalega stjórnun á komandi kjörtímabili.
Með kveðju,
Sveinn Steinarsson
Hrönn Guðmundsdóttir
