Tónlistarmaðurinn KK ferðast nú um landið ásamt ungum vini sínum, Gauki. KK er landsmönnum kunnur en Gaukur er að hasla sér völl á Íslandi. Hann er nýútskrifaður úr munnhörpunámi í Berklee Collage of Music og hefur ferðast um allan heim til að spila tónlist, meðal annars með Kaleo. Hann má sjá á meðfylgjandi mynd ásamt Kaleo og Rolling Stones, hvorki meira né minna, en Kaleo hefur nú í nokkur skipti hitað upp fyrir Rolling Stones.
Með KK verður hann töluvert að spila á slide gítar eða Hawaii gítar eins og það er líka kallað og raddar í bluegrass stíl auk þess sem hann mun án efa grípa í munnhörpurnar sínar.
Þeir munu spila úrval af lögum KK og aðrar hugljúfar dillandi melódíur. KK ætlar að vígja nýjan gítar á túrnum, forlátan Collings gítar frá Texas. Og allt verður þetta flutt gegnum einn hljóðnema.
Missið ekki af einstökum tónleikum á Hendur í höfn 18. október. Miðasala er á midi.is og borðapantanir á hendurihofn@hendurihofn.is
