By Hafnarfréttir 
Enn ein fréttin hefur borist af breytingum í sjávarútvegs- og fiskvinnslumálum í Þorlákshöfn, nú um að Frostfiskur hætti starfsemi. Þegar upp undir 100 störf tapast á innan við tveimur árum segir það sig sjálft að það hefur mikil áhrif á ekki stærri stað sem Þorlákshöfn er. Eigendur fyrirtækja taka ákvörðun sína á viðskiptalegum grunni. Ástæður þessa geta verið margarvíslegar eins og samþjöppun aflaheimilda, minni afli á markað, gengismál, fiskverð, staðsetning fiskmarkaða, rekstrarkostnaður, samkeppnishæfni og fleira. Í sjálfu sér er ekki séð fyrir endann á þeirri þróun sem hefur verið í áratugi að fiskvinnslan færist inn á suðvesturhorn landsins. Fulltrúi Sjávarklasans var með áhugavert erindi á Hafnasambandsþinginu á Ísafirði á síðasta ári. Sýnd var áratuga þróun hvernig fiskvinnslan hefur færst nær aðalútflutningsgáttum landsins sem eru hafnir á höfuðborgarsvæðinu og Keflavíkurflugvöllur. Sú skoðun kom fram að þessi þróun haldi áfram, að mest öll fiskvinnsla verði á næstu árum komin á innan við 100 km radíus út frá þessum gáttum til útlanda. Þorlákshöfn er innan þessara marka. Greið leið er til Keflavíkurflugvallar um Suðurstrandaveginn og til hafna á höfuðborgarsvæðinu. Ný gátt fyrir inn- og útflutning opnaðist með siglingum skipsins Mykines milli Rotterdam og Þorlákshafnar. Eins og hefur komið í ljós þá dugar þetta eitt og sér ekki í þessum málum en getur opnað önnur tækifæri.
Á samfélagsmiðlum má sjá að fólk spyr eðlilega hvað bæjarstjórnin ætli að gera til að bregðast við þessari óheillaþróun. Við sem erum í bæjarstjórn getum engu ráðið um hvaða ákvörðun eigendur fyrirtækja taka en það sem við getum gert er að undirbúa jarðveginn fyrir þá sem á eftir koma. Það gerðist ekki af sjálfu sér að Smyril Line Cargo er komið með Mykinesið í vikulegar siglingar á milli Árnessýslu/Ölfuss og Evrópu. Sá möguleiki varð til með einhuga samstöðu bæjar- og hafnarstjórnar um að skapa aðstöðu fyrir millilandasiglingar af þeirra stærðargráðu sem nú er orðin. Ýmsar breytingar voru gerðar á höfninni af mikilli útsjónarsemi í samstarfi við siglingasvið Vegagerðarinnar. Þessar breytingar urðu til þess að Mykinesið er komið í höfn og á næsta ári kemur fyrsta skemmtiferðaskipið. Koma fyrsta skemmtiferðaskipsins mun án efa vekja athygli annara á nýjum áfangastað og styðja við þau fyrirtæki sem hér eru byggja sig upp í ferðaþjónustugeiranum.
Hafi einhver áhuga á að koma með starfsemi til Þorlákshafnar lítur sá hinn sami á hvaða aðstaða sé í boði, hvað sé á skipulagi og hvort til séu tilbúnar lóðir með aðgengi að orku, vatns- og fráveitum. Það er til lítils að segja “jú við verðum tilbúin með skipulag og veitur eftir tvö til þrjú ár”. Með þetta í huga er tilbúið á skipulagi gríðarstórt svæði fyrir fiskeldi vestur með ströndinni frá Þorlákshöfn, ný fiskeldisstöð er þar í uppbyggingu og komin að hluta í framleiðslu. Bein siglingaleið til Evrópu hlýtur að gera svæðið áhugaverðara en áður.
Uppbygging á iðnaðarsvæðinu á Hafnarsandi, upp af Keflavík og hefur vinnuheitið Víkurbraut, er hafin með byggingu Lýsis hf á nýrri fiskþurrkun. Á næstu vikum hefjast lagnir veitna inn á þetta svæði og ekkert því til fyrirstöðu að úthluta tilbúnum lóðum til áhugasamra. Endurskipulagi á upplandi hafnarinnar er á lokastigi og verða þar fjölmargar lóðir fyrir hafnsækna starfsemi. Að auki eru tilbúnar iðnaðar- og verslunarlóðir innanbæjar. Með þetta allt á borðinu eru bæjarstjórinn og bæjarfulltrúar með alla anga úti með að kynna hvað er í boði og framundan er sérstök kynning á atvinnulóðum. Eins og áður hefur verið sagt þá gerist ekkert af sjálfu sér, við íbúar Þorlákshafnar verðum að selja þá hugmynd að hér sé gott að byggja upp fyrirtæki, bein leið er héðan til Evrópu og til Reykjavíkur. Einnig verða Sunnlendinga að slást í lið með okkur í að sækja fé til ríkisvaldsins fyrir áframhaldandi uppbyggingar hafnarinnar sem er jú eina inn- og útflutingsgátt Árnessýslu.
Guðmundur Oddgeirsson, bæjarfulltrúi félagshyggjufólks í Ölfusi.