Leikskólinn Bergheimar fékk þriðja grænfánann

Síðastliðinn miðvikudag fékk Leikskólinn Bergheimar afhentan þriðja grænfánann sinn en Margrét Hugadóttir frá Landvernd afhenti skólanum fánann.

„Börnin sungu lagið Vertu til er vorið kallar á þig og var Margrét með grænfánaleikfimi og tóku allir þátt. Búið var til líkan af Þorlákshöfn í vetur og komu öll börnin á leikskólanum að gerð þess. Líkanið tengist grænfánaverkefni þar sem þemað að þessu sinni var átthagar og landslag.“ Segir á heimasíðu Bergheima.

Grænfánaverkefnið er alþjóðlegt umhverfismenntarverkefni sem rekið er af Landvernd á Íslandi. Markmið verkefnisins er að auka umhverfismennt, menntun til sjálfbærni og að styrkja umhverfisstefnur skóla. Verkefnið er stærsta umhverfismenntaverkefni í heimi og er haldið úti af samtökunum Foundation for Environmental Education.

Margrét Hugadóttir afhendir Dagnýju Erlendsdóttur leikskólastjóra þriðja grænfánann.